ماذا تعني المراهقة

طبعا ما رح قوللكن شو هوي سن المراهقة لاني ما بتوقع انو يكون حدا ما بيعرف شو هوي
شعور الطفولة شعور حلو كتير بس بطبيعة الحياة نحنا رح نهجر هالشعور ورح يظل مجرد ذكرى وندخل بمرحلة جديدة من حياتنا
برايي انو بهالمرحلة بتتحدد شخصية كل واحد منا وهالمرحلة هيي الي عبترسملنا بقية الطريق من عمرنا.
كتير من الناس الي بيشعروا بالوحدة لما يبلغوا هي المرحلة وبيصيروا يدوروا على ناس بيشبههوهن بانطباعاتن (على اساس انن بيفهموا عليهن)بس الصدمة الاولى هي انو الناس الي بيشبههوهن رح يكونوا قلال او معدومين لانو كل انسان نموذج بتفكيرو.
برايكن شو دور الاهل هون وكيف ممكن يساعدو اولادن ,وخاصة اذا مال الابن أو الابنة الى اصدقاء شاذين بتفكيرن وتعلقو فيهن بشكل غريب.وحتى انهم ممكن يجروهن لتصرفات كتير بشعة متل المخدرات والدخان (بعد ما صار الواحد ما يشعر انو صار شب غير اذا حمل سيجارة)وما ننسى كمان الانتحار
وبعد في نقاط كتير ممكن نبحثها بعدين بهلموضوع.

المراهقة فترة حلوة والطفولة احلا
شكرا لوجودك الجميل الي عطر منتدانا نورتينا يا غالية

شكرا الك صديقتي زهرة ومرحلة المراهق هي من أكثر المراحل الصعبي الي بتمر على الشخص كونو اكتشف اولا شغلات جديدي بحالو رح تحسسو بالاحراج وهون ممكن الطفل الي عم ينتقل لمرحلي جديدي يتوجه نحو اتجاهين او المحافظة التامي لدرجة التعقيد والانطواء على نفسو وهذا شي خطير بتضهر اثارو لبعدين بسوء التكيف الاجتماعي وامراض اخرى
أو الانحراف والانجراف وراء الرغبات والشي الممنوع هون في شغلي انو الشخص او الطفل بطل يقبل بالأوامر هون صار يحسو بحالو شخصية مستقلة لهيك لازم نعتمد معو سواء الاهل أو المحيطين في اسلوب النقاش وممنوع نقلو عن شي غلط بلا ما انو ناقشو او نتبع معو اسلوب الكبت بهي المرحلي لانو رح يصير يتصرف من ورا ضهر الاهل تصرفات سيئة
الحل الامثل انو نحسسو انو شخص مسؤول واعي وبيعرف يميز الصح من الخطأ وما نعزلو عن اصدقائو تقبلي مروري

صديقتي همس الحنين صدقيني في بعض الاشخاص المراهقين ما بينفع معن غير الضغط مع انو غير محبذ لانو اذا استخدمنا الحوار والنقاش معن يمكن يعتبروا انو موقفنا ضعيف وهني الصح

القصص الي حكتا لين عن انتحار الاطفال كمان الها علاقة بالمراهقة
لانو هالاطفال لو انن ما انتحروا يا ترى بس يوصلوا لمرحلة المراهقة كيف رح ينظروا للحياة وكيف لازم نحنا نتعامل معن
عنجد الاهل هني الي بياثروا ع الاطفال ومنلاحظ انو بكل بيت الولد بيقلد بيو والبنت بتقلد امها

مشكورة صديقتي زهرة على هذا الموضوع الي بيستحق الأهتمام منا جميعاً
أنا بأكد على كلام الجميع وكلام صديقنا ظهر الجبل .
مرحلة المراهقة هي مرحلة حساس في حياة كل أنسان .فمن خلالها تتضح للأنسان أنماط جديدة على حياته وهي نواحي سلبية وايجابية فنواحي السلبية هي عدم قدرة الأسرة والمجتمع من تفهم نفسية المراهق -ة- وطباعه المتغيرة دوماً والتي من الممكن أن تؤثر جداً على مستقبله
فكثيراً نرى أبناء الأسر التي تؤمن لأطفالها كل ما يحتاجه من متطلبات (( مادية)) وبالنتيجة فهم فاشلون بجوانب عدة من حياتهم
أما الجانب الأيجابي فهو هو مساعدة هذا الطفل المراهق على تكوين نفسه عن طريق المساعدة عن بعد (وليس محاولة التأثير المباشر عليه لأنه يكون في هذه المرحلة كما قال أحد العلماء ((الطفل صفحة بيضاء أن وضعت عليها بصمة تبقى مدى العمر))


تقبلي مروري بكل احترام

شكرا طتير على مروركم الرائع
وانتوا الي اغنيتوا الموضوع
ومعك حق يا مراد ورح قول لانس هون انو فينا نربط بين الايمو ومرحلة المراهقة
يعني لو انو هذا الشخص (الايمو) توجه توجيه صحيح بمراهقتو يا ترى كان وصل لهاي المرحلة؟

هلا ابو بيبرس والله انا برأي الموضوع كتير بسيط عنا لانو نحنا ما نعرف غير نقلد بس نقلد لا وما منقلد اي شي منقلد المظاهر وبس يعني شبابنا وصبايانا ما بيتجاوز تفكيرن حد اللباس
وعلى سيرة التقليد حضرتولي برنامج لحظة الحقيقة الي مقلدين فيه برنامج امريكي اسمو the moment of trouth

بس برأي انو الي بفكر هيك تفكير الله لا يردو بريحنا منو

يا مهند طالما انو لكل بني ادم عقل يفكر في وعين يشوف فيها فهوي لازم يحمل نتيجة كل فعل بيقوم في

تأكيداً على ردود الاخوه ولو ان معلوماتي متواضعة ....لا نستطيع ان نهرب من مسؤليتنا تجاه المراهقين مش بس الاهل ...المجتمع ككل ...ويمكن التفكير السلبي بهيك موضوع انو كل واحد يحمل نتيجة تصرفاتو هو خطأ بحق هالاشخاص وبحق انفسنا ....الله عطانا عقل لنتعلم ونعلم غيرنا ....وتحياتي للجميع

هذا الكلام الي عبتحكي يا جناد حلو كتير ومنطقي بس من شان الايمو وشبابنا الي عبيقلدن بحس انو هذا الكلام ما بينطبق عليهن

بالنهاية كل شخص عندو قناعة وطريقة باستيعاب الاخرين ....بس انا ما بحب اسلخ جلد حدا لنفس الخطأ الي انا سبب فية ....وكمان ما بعرف شو هو الايمو ....يمكن لو كان على دوري كنت اميت معن ههههههههه

يا مهند هلق جماعة الايمو الموجودي عنا فيك تثبتلي بغير الحكي طبعا انن الن نفس الافكار مع الموجودين برا . انا بشارطك انو الشباب متأثرين بس باللبس وهالدندشي . بس والله انو في حدا انتحر او عبيعذب حالو ,الله وكيلك اول ما تدقون شوكة بيركضوا ع المشفى يقطبوا الجرح .
طبعا ما بدي انكر انو في اختلافات بالدين والمعتقدات وانو هي الافكار موجودي
وما بنكر انو في شباب اللهم عافينا مو مخليين من الحشيش للسم الهاري .
بس هذول مواضيع مستقلة عن الايمو. لا تخلط يا مهند بالافكار

والله هالقصة اسى بعدني بسمع فيها